14 - 21 Oktyabr tarixlərində “R Group Holding” şirkətlər qrupu və “Digital Umbrella” şirkətinin nümayəndə heyətinin Çin Xalq Respublikasına səfəri baş tutmuşdur. Səfərin əsas məqsədi “Digital Umbrella” və ECURS şirkətləri arasında imzalanmış anlaşma memorandumu çərçivəsində yeni inkişaf imkanlarını tədqiq etməkdən ibarət olmuşdur. Bu məqsədlə SpaceWill, GEOWAY, MapCore, “Xingyun Group”, “Feima Robotics” və bir sıra digər dövlət və özəl təşkilatların rəhbərləri ilə görüşlər keçirilmiş və birgə fəaliyyət istiqamətində faydalı məlumat mübadiləsi aparılmışdır. Səfər etmiş heyətin bəzi böyük şirkətlərin istehsalat mərkəzləri ilə yaxından tanış olmaq imkanı olmuşdur. 

Səfər zamanı, peyk təsvirlərinin emalı vasitəsi ilə ortofoto xəritələrin, rəqəmsal yüksəklik və səth modellərinin yaradılması, süni intellektin tətbiqi ilə yolların, torpaq sahələrinin, əkin və meşə ərazilərinin, su hövzələrinin, mədənlərin, neft və qaz kəmərlərinin aşkarlanması və monitorinqi, fövqəladə hallar zamanı fəlakət ərazilərində aparılan intensiv monitorinq və xilasetmə işlərinə dəstək istiqamətində hazırlanmış proqram həllərinin təqdimatları keçirilmiş və geniş məlumat mübadiləsi aparılmışdır. Bundan əlavə, GEOWAY şirkəti tərəfindən milli məkan məlumatlarının idarə olunması üçün hazırlanmış informasiya sistemi barədə ətraflı məlumat təqdim edilmişdir. Çin Xalq Respublikasının ən böyük elektron pərakəndə satış platformalarından birinə sahib olan “Xingyun Group” şirkətlər qrupunun nümayəndələri ilə aparılmış fikir mübadiləsi çərçivəsində potensial əməkdaşlıq imkanları müzakirə olunmuşdur.

Keçirilmiş görüşlərin nəticəsində, bir neçə istiqamətdə yeni texnologiyaların transferi, birgə istehsalatın təşkil olunması, ortaq məhsulların yaradılması və bu məhsulların beynəlxalq bazara çıxarılması məqsədi ilə qarşılıqlı əməkdaşlığın qurulmasına qərar verilmişdir.